Zer da Gazte-txartela?
Gazteei zuzendutako beste txartelak ez bezala, Gazte-txartela Europan homologatuta dagoen Euskadiko gazte-txartel bakarra da, European Youth Card Association (EYCA) elkartearen barne baitago. Beraz, Gazte-txartelaren titularrek, Gazte-txartelak eskaintzen dizkien abantailaz baliatzeko aukera izateaz gain, beste gainerako Autonomia Erkidegoetako eta EYCAko kide diren Europako herrialdeetako gazte-txartelen abantailak ere balia ditzakete.
Gazte-txartela 30 urte bete arte izango duzu.
Gazte-txartelak hainbat modalitateren bidez eskaintzen ditu abantailak:
- Deskontu iraunkorrak Euskadin: Gazte-txartelak 2.000 deskontu inguru eskaintzen ditu honako eremu hauetan askotariko produktuak eta zerbitzuak eskuratzean: kultura, kirolak, garraioak, ostatua, prestakuntza, osasuna, turismoa eta askoz gehiago. Aurkitu itzazu deskontuak modu errazenean deskontu-bilatzailearen bidez.
- Gazte-txartelaren packa: urtero, Gaztetxarteldun guztiei Gazte-txartelaren pack bat oparitzen zaie, hau da, behin erabiltzeko deskontu-kupoi berezien taloitegi bat, non askotariko kolaboratzaileak agertzen diren. Ikus Gazte-txartelaren Packari buruzko informazio gehiago.
- Zozketak eta lehiaketak: aldian-aldian, Gazte-txartelak sari interesgarriak dituzten zozketak eta lehiaketak egiten ditu Gazte-txartelaren web-orrian: bidaiak, ikuskizunetarako sarrerak, liburuak, teknologia eta askoz gehiago. Kontsultatu abian dauden zozketak eta lehiaketak, baita aurreko zozketen eta lehiaketen irabazleak ere.
- Bidaia-asegurua: programak eskaintzen dituen abantailez gain, Gazte-txartelak guztiz doan eta mundu osoan baliagarria den bidaia-aseguru bat barne hartzen du. Bidaia-aseguru hori automatikoki aktibatzen da Gazte-txartela eskuratzerakoan. Kontsultatu Gazte-txartelak barne hartzen duen bidaia-aseguruaren baldintzak.
- Abantailak Euskaditik kanpo: Gazte-txartela Europako Gazte Txartel Elkartearen (EYCA) barne dagoenez, zure Gazte-txartelarekin Euskadin eskaintzen dizkizugun abantailez baliatzeaz gain, EYCAren barne dauden beste Autonomia Erkidegoetako eta Europako 38 herrialdeetako Gazte-txartelak eskaintzen dituzten 80.000 abantaila baino gehiago baliatu ahal izango dituzu. Guztiek gazte txartelaren irudia erabiltzen dute, eta irudi horri esker abantailak eta deskontuak eskaintzen dituzten erakundeak eta establezimenduak zein diren jakin ahal izango duzu. Kontsultatu Euskaditik kanpo balia ditzakezun abantailak (Abantailak Euskaditik kanpo esteka).
Nazioarteko Ikasle Txartelaren (ISIC) kasuan ez bezala, Gazte-txartela eskuratzeko ez da beharrezkoa ikaslea izatea; nahikoa da 14-29 urte izatea eta Euskadin erroldatuta egotea, nahiz eta beste Autonomia Erkidego batetik edo atzerritik etorria izan.
