Euskadin bizi diren 15 eta 29 urte bitarteko 10.000 gaztetik, infekzio gonokoziko, sifilis edo chlamydia diagnostikatutako 67,3 kasu berri zegoen 2022an
Jarraian, Osakidetzaren sexu-transmisiozko infekzioen (STI) kontsulta espezifikoetara joan diren eta infekzio gonokoziko, sifili eta/edo chlamydia diagnostikatu zaizkien 15-29 urteko pertsonen kasuei buruzko datu batzuk aurkeztuko dira, horiek baitira Euskadiko gazteen artean STI ohikoenak. Datu horiek Hiesaren eta Sexu Transmisiozko Infekzioen Planak eman dizkio Gazteen Euskal Behatokiari.
Zehazki, emandako datuak honako Osakidetzaren STI kontsulta espezifiko hauetan jasotakoak dira: Bilbokoa, Basurtuko Unibertsitate Ospitaleko Gaixotasun Infekziosoen Unitatearen mendekoa, Donostiakoa, Donostia Unibertsitate Ospitaleko Gaixotasun Infekziosoen Unitatearen mendekoa, Gasteizkoa, Txagorritxuko Ospitaleko Barne Medikuntzako eta Gaixotasun Infekziosoen Zerbitzuaren mendekoa (azken hori 2017an ezarri zen), eta, 2021etik aurrera, Mendaroko Ospitaleko STI kontsultetan eta Basurtuko eta Donostiako ospitaleetako Mikrobiologia Zerbitzuetan jasotakoak ere zenbatzen hasi dira.
Datu horiek, nolanahi ere, datu partzialak dira eta ez dira zaintza epidemiologikoko sistema bat, baina sexu-transmisioko infekzioen egoera eta bilakaera aztertzeko baliagarriak dira.
Euskadin, 2012tik 2022ra (eskuragarri dagoen azken datua), aipatutako STI kontsultetan infekzio gonokozikoa, sifilia eta/edo chlamydia diagnostikatu zaien 15-29 urteko gazteen kasu berrien kopurua 362tik 2.089ra igo da. Hori, neurri batean, logikoa da, kontuan hartuta gora egin duela datuak hartzen diren kontsulten kopuruak, baina 2021eko eta 2022ko zifrak konparatzen baditugu, iturri berberetatik abiatuta, ikusten dugu gorakada nabarmena izan dela.
Biztanleria osoan ere gorakada handia izan da diagnostikatutako infekzio berrien kopuruan, baina gazteen kasuen proportzioak, biztanleria osoarekiko, gora egin du eta erdia baino gehixeago da 2022an (% 52,8 da, 2012an baino ia hamabost puntu altuagoa).
2012tik 2022ra, kasu berriek gora egin dute aztertutako hiru STI motetan, baina chlamydiak eragindako infekzioak dira, aztertutako serie osoan, ohikoenak gazteen artean. Izan ere, 2022an, gazteen artean detektatutako kasu berrien erdia baino gehiago chlamydiak eragindako infekzioengatik izan dira (2.089etatik 1.340); infekzio gonokozikoaren kasuak 670 izan dira, eta sifiliaren kasuak, berriz, 79.
2022ko datuei erreparatzen badiegu, ikusiko dugu 15 eta 29 urte bitarteko pertsonei diagnostikatutako 2.089 infekzio gonokoziko, sifili eta/edo chlamydia kasuetatik 1.173 gizonezkoei dagozkie eta 916 emakumezkoei, hau da, gazteen artean detektatutako kasuen % 56,2 gizonenak dira. Hala ere, chlamydiak eragindako infekzioak soilik hartuta, ikusten da ugariagoak izan direla emakumeen artean gizonen artean baino.
Adinak gora egin ahala, hiru infekzio-motetatik kasu gehiago erregistratu dira; guztira, 303 kasu 15-19 urteko pertsonen artean, 849 kasu 20-24 urteko gazteen artean eta 937 kasu 25-29 urteko gazteen artean.
Lurralde bakoitzean gazteen artean detektatutako kasuen proportzioa, gutxi gorabehera, lurralde bakoitzeko biztanleria-bolumenarekiko proportzionala da; Bizkaian 1.049 kasu berri detektatu dira, kontuan hartutako hiru ITS motak gehituz, Gipuzkoan 688 kasu berri diagnostikatu dira eta Araban 352 kasu berri.
Datu horiek lotura zuzena dute Nazio Batuen Erakundeak ezarritako Garapen Iraunkorrerako Helburuen 2030 Agendaren hirugarren helburuarekin: "Osasuna eta ongizatea".
